Ауылдарды дамыту жоспары талқыланды
Биыл Қостанай облысында жергілікті маңыздағы 1200 шақырым тас жол жөнделеді. Бүгін осы мәселе өңірдің барлық деңгейдегі әкімдері қатысқан жиында талқыланды. Сондай-ақ, жиналыста халықты сапалы ауыз сумен қамту мәселесі де көтерілді.
Гүлбарам Мұсағазина, Облыстық экономика және бюджеттік жоспарлау басқармасының басшысы:
-Биыл 55 жобаны жүзеге асыруға 12,4 млрд бөлінген. Жыл соңына дейін ауыл тұрғындарының 90%-ы таза сумен қамтамасыз етіледі.
Ауыл тұрғындарының денсаулығы да басты назарда. Биыл Қостанай облысы бойынша шалғайдағы 21 елді мекенге жаңа дәрігерлік амбулатория мен фельдшерлік пункттер салынады. Ал «Ауыл – Ел бесігі» бағдарламасы аясында спорт нысандары бой көтеріп, ішкі жолдар жөнделеді.
«Ауыл аймақтың дамып, ілгерлеуіне тауар өндірушілер де үлес қосып келеді. Олар жыл сайын инфрақұрылымды қалпына келтіріп, жөндеу үшін миллиондаған қаржы құяды», - дейді облыс әкімі Құмар Ақсақалов.